來自星星的炸雞和啤酒-Palm Palm Piano

星星熱真係魅力沒法擋! 我指只係香港, 或者大陸, 或者台灣....... 千頌依一句: 「初雪就應該要有炸雞同啤酒」,即刻引發咗一場生靈塗炭, 陷無數雞隻於水深火熱之中.... 唉~ 但係呢一間千頌依同劉世美一齊去食炸雞嘅舖頭, 响首爾居然唔係咁多人知喎! 真係架, 唔係阿渣司話我知, 係呢間炸雞店嘅老闆娘講架! 話去佢舖頭啲人, 好多都唔知呢度同千頌依嘅關係喎~

今次我就有機會去呢間我自己都幾鍾意嘅舖頭, 飲咗少少我自己都幾鍾意嘅酒, 同食咗啲我覺得麻麻地好食嘅炸雞....... (如果老闆娘識睇中文字, 我實死梗! )

老實講, 嘢食一般, 啤酒唔錯, 氣氛一流, 剩係話俾人知我去過呢間千頌依都去過嘅舖頭就夠型啦! 唔好怪我虛榮, 我只不過係膚淺之嘛! 事實上, 我自己都幾鍾意呢隻英倫復古風格嘅佈置, 老闆娘曾經响倫敦留學, 舖頭嘅裝飾都係來自佢自己讀書時收集嘅古董珍藏~

 

講咁耐, 究竟呢間舖頭响邊? 叫咩名?

Palm Palm Piano
337-2, Sangsu-dong, Mapo-gu

其實即係宏大附近, 老闆娘仲驚我哋下次唔識去, 畫埋地圖俾我添~ 老老實實, 下次我會唔會再去? 未必! 睇住幅圖識唔識再去? 應該都係唔識架喇~~~~