韓國六日五夜行程

我十幾年前跟團去過漢城一次, 嗰次之後, 我同自己講, 呢個咁嘅鬼地方, 老土落後又悶, 呢世都唔會再嚟! 點知一個唔覺意就輪迴咗十幾世~

舊年, 我仲帶埋一家大細, 有老有嫩咁嚟咗個首爾團, 八個團友, 老嘅七十幾, 嫩嘅十二歲, 再加埋中男同中女..... AI..... 可想而知有幾難計劃~ 我挖盡心思, 終於不負眾望,度出一個自以為完美嘅行程:

第一日    香港國際機場→仁川國際機場→明洞宜必思酒店→東大門

第二日    首爾塔+泰迪熊博物館→光化門→景福宮→仁寺洞→三清洞、北村→晚餐→明洞

第三日    愛寶樂園

第四日    南大門市場→鷺梁津水產市場→Coex水族館→明洞→亂打劇場→汗蒸幕

第五日    南怡島→小法國村→新沙洞

第六日    仁川國際機場→香港國際機場

正所謂人算不如天算, 本來以為完美無暇, 點知, 長者們都覺得太攰, 於是每日景點由六變三, 有時由三變一, 又因為落雨而打亂咗少少計劃。不過, 去旅行就係有呢啲變數先好玩....... 而且男女老幼都玩得相當愉快....... 哈哈~雖然冇調查統計, 純粹老屈...... 但係咁樣講個心會舒服啲! 究竟呢個行程成唔成功呢? 如果有人真係跟足晒, 唔該話聲我知, 睇下我可唔可以轉行做個完美嘅旅行策劃人! 話說回來, 我哋呢個團雖然唔跟足行程, 不過我自己就覺得幾好玩, 因為如果係我自己去, 我個行程就會係咁:

第一日    香港國際機場→仁川國際機場→酒店

第二日    午餐→明洞→下午茶→晚餐→飲

第三日    午餐→宏大→下午茶→晚餐→飲

第四日    午餐→新沙洞→下午茶→晚餐→飲

第五日    午餐→東大門→下午茶→晚餐→飲

第六日    仁川國際機場→香港國際機場