也來寫韓國

韓國呢幾年好HIT, 我又幾好彩咁, 呢兩三年因為工作關係頻頻去韓國, 加埋自己去旅行, 粗略計計冇廿次都有十五六七次, 去咗唔少地方, 又識埋唔少韓國人, 就係咁,個個friend去親韓國都走嚟問我有咩介紹。諗諗下, 長痛不如短痛, 一於寫下BLOG同人一次過分享下, 下次你又問我有咩介紹, 我就直接叫你去個BLOG度睇算喇~

言歸正傳。

大家都應該知我啱啱又去完韓國返來啦, 一如往常, 五花腩食到怕, 韓國燒酒飲到嘔, 不變嘅道理! 今一次仲去埋啲星星熱點, 食埋啲星星炸雞, 梗有飲埋啲星星大熱啤酒啦!

一班韓國男工作人員猛問我, 點解《來自星星的你》响中國咁HIT? (响呢度, 唔好搞咩種族分化喇~ 佢所謂中國, 係包括中國,香港,台灣同澳門! 唔好玩政治, OK?) 大佬, 我點知啫, 人睇我又睇, 不過又幾好睇咁解囉! 反問返佢哋, 乜星星响韓國唔HIT咩? 佢哋竟然話唔HIT呀, 冇人講喎! 我R晒頭, 唔係化?? 居然係咁咩??? 結果有一日問下啲韓國女仔, 超~ 人哋話好HIT架! 果然係"阿渣司" (大叔咁解), 自己唔睇就話人哋唔紅, 你唔識唔緊要, 唔好誤導我吖嘛! 等我返嚟俾人笑就唔好啦!

唔覺意又飄走咗添~

你話韓國人識賺錢又好, 創意澎湃都好, 今期SBS電視台响首爾東大門設計廣場舉行展覽, 將《來自星星的你》嘅拍攝場景重現, 包括都敏俊同千頌伊嘅屋企, 响劇中出現過嘅服飾及物品,仲有啲好得意嘅拍攝方式俾人影相添! 講真, 我唔係星星迷, 但行入去都覺得好興奮架,可以坐响都敏俊司張床喎! 不過有去趁早喇，展期去到八月十五日咋! 點去? 搭地鐵去到東大門歷史唔知乜乜站, 1號出口就係!